SUSPEK NGA NAGPATAY SA ILONGGO OFW SA SOUTH KOREA, NADAKPAN NA
Nadakpan na sang Korean Police ang suspek nga nagpatay kay Ilonggo OFW Angelo Claveria sa South Korea.
Suno kay Mary Mae Claveria, nakabaton sila sang email halin sa Korean Police nga nadakpan ang suspek sa pagpatay sa iya utod.
Pero wala ginhingadlan sang Korean Police ang pangalan sang suspek.
Luyag sang pamilya Claveria nga mahibaluan ang pangalan sang suspek.
Bangud sa pagkadakop sa suspek, ginkalipay gid sang pamilya Claveria ang development sa kaso bangud nahatagan na gid man sang hustiya ang pagkapatay ni Angelo.
Madumduman, nasapwan ang tul-an ni Angelo sa water purifying tank sa Hwaseong City, Gyeonggi province, South Korea sang Abril subong nga tuig.
Naconfirmar nga si Angelo ang tul-an matapos nagmatch ang DNA sample nga ginkuha sa iya iloy kag sa sample halin sa tul-an.
Disyembre 2015 ang katapusan nga communication sang iya pamilya kay Angelo kag ginapatihan nga ginpatay ini sang 2016. (JoMaque)