Tricycle, nabungguan sang taxi sa City Proper
Iloilo City — Nabungguan sang taxi ang tricycle sa intersection sang Ledesma-Mabini Streets, City Proper las 3:45 kaina sang kaagahon (Setyembre 20).
Nagreklamo sang pagpalanakit sang lawas ang pasahero sang tricycle kag manugbaligya sang utan nga si Ma. Elena Sol, 56 anyos sang Bakhaw, Mandurriao samtang nabagrasan naman sa ulo ang driver sang tricycle nga si Wilfredo Jazmin, 61 anyos sang Baldoza, Lapaz.
Ginpahayag ni Jazmin nga nagalabay sila sa intersection sang gulpi lang nabungguan sang taxi kag nadagdag ang iya mga karga nga ulotanon.
Pareho nga gindala sa West Visayas State University Medical Center ang tricycle driver kag iya pasahero.
Ginrason naman sang driver sang Light of Glory taxi nga si Crispin Juanico, 37 anyos sang San Joaquin nga wala niya matalupangdan ang tricycle.
Nagpasalig ang taxi driver nga abagahon ang gasto sa ospital sang mga biktima kag pagpakay-o sang tricyle. (JoMaque)