(UPDATE) Paupas sang damang sa Leganes, organisado base sa imbestigasyon sang Leganes police

Leganes, Iloilo–Organisado ang paupas sang damang sa banwa.

Base ini pagpakighinun-anon ni PSI Dadje Delima, hepe sang Leganes MPS, sa 17 ka mga nadakpan nga nagapa-upas damang sa Barangay Lapayon sang Oktubre 11.

Suno kay Delima, daw pareho lang sang bulangan ang sitwasyon sang compound samtang naga-upas ang mga damang.

Ginpa-athag sang mga nadakpan kay Delima nga ginakilo man nila ang mga damang agud magpatas ang away. Ginalantaw man suno sa iya ang kadalagku kag kalagba sang kamoy sang mga damang nga ginpahayag naghalin pa sa Mindanao.

Sang nagsugod ang spider derby, naglab-ut pa lang sa tag-1 ka libo ka pesos ang pusta tubtub nga nagtaas kag naglab-ut sa P10,000.

‘Ginkasuhan’

Ginpasakaan sang kaso nga illegal gambling ang 17 ka mga nadakpan.

Suno kay Delima, nahingagaw nila file ang kaso kahapon apang wala natapos sang mga arestado ang pagproseso sang ila piyansa gani nagapabilin sila nga preso.

Nagalab-ot sa P7,500 ang surety bond sang mga nadakpan samtang P60,000 naman ang cash bond agud makaguwa sila sa prisuhan.

Naggutok ang prisuhan sang Leganes Police Station bangud sang kadamuon sang mga nadakpan. (AGB)