2 ka babaye patay, 1 pa pilason sang ginpangbuno sa sulod balay sa Molo

Iloilo City–Duha ang patay kag isa ang padayon nga ginabulong sa ospital matapos ginsulod sa balay kag ginpangbuno sa Brgy. San Antonio, Molo kaina sang aga, Oktubre 15.

Gindeklarar nga dead-on-arrival sa Iloilo Doctor’s Hospital si Teresita Tagriza, 74 anyos, kag timbang nga si Remedios Malaga, 52 anyos sang Sambaludan, Oton bangud sang mga pilas sa lawas.

Padayon naman nga confined sa ospital ang bata ni Teresita nga si Julie Ann Peñafiel, 35 anyos nga may pilas sa wala nga butkon kag abaga. Wala napilasan ang duha ka tuig nga bata nga lalaki ni Julie Ann nga iya ginakungkong samtang ginabuno siya sang suspetsado.

Suno kay SPO2 Jonathan Tolentino sang Molo Police Station, nagpakuno-kuno nga mabakal sang kahoy ang ang suspek kag sang ginbuksan ni Teresita ang puwertahan, gilayon ini nga ginbuno.

Ginsulod man sang suspetsado sa balay ang duha pa ka mga biktima kag ginpangbuno. Ginapatihan sang Molo police nga hold-up ang motibo sa krimen bangud may negosyo nga pa-utang si Teresita.

Ginapatihan man nga duha ang suspetsado sa krimen kag isa dire ang ginkilala kay Rene Diocos Jr, tumandok sang Alimodian apang temporaryo nga naga-istar sa Compania Central, Molo. May pilas si Diocos kag ginabulong man sa ospital apang nanginwala ini nga involved siya sa krimen bisan gintudlo sang nakaluwas nga biktima. (AGB)