Daan nga drug group sa syudad, ginapatihan nagbulos sa nabungkag nga Odicta kag Prevendido Drug Groups — RDEU

Iloilo City — Nagapati ang mga pulis nga ginbuslan sang daan nga drug group sa syudad ang nabungkag nga Prevendido kag Odicta Drug Groups sa Western Visayas.

Suno kay PSI Kennith Bermejo, team leader sang Regional Drug Enforcement Unit (RDEU), nagdaku na ang drug operations sang wala niya ginhingadlan nga drug group.

May mga police operations suno sa iya ang amu nga drug group sa Bacolod City, Roxas City, Guimaras, kag iban pa nga lugar sa rehiyon nga nagaangut sa bag-o nga drug group leader.

Dugang pa niya, dalagku nga kantidad sang kuwarta ang ginadala sa amu nga drug group leader nga nagkadtu na ukon nagbakasyon sa Manila.

Ginapatihan mas nauna pa gintukod kag nag-operate ang amu nga grupo kumparar sa Odicta kag Prevendido Drug Groups suno kay Bermejo.

Wala lang nagsikat suno sa iya ang amu nga grupo bangud gin-monopoliya sang Odicta kag Prevendido Grouop ang illegal drug trade sa rehiyon.

Ginbuyagyag ni Bermejo nga madamo sang koneksyon ang natungdan nga drug group kag ginapatihan halin sa New Bilibid Prison ang ila drug supply.

Naglapad ang drug operation sang amu nga drug group suno kay Bermejo sugod sang nagligad nga tuig. (JoMaque)