Mga vendors sa Iloilo Central Market, nagapamatok sa plano sang city government nga redevelopment sa merkado

Iloilo City (UPDATE) – Indi pabor ang mga vendors sa Iloilo Central Market sa plano sang City Government nga redevelopment sa merkado.

Suno kay Mr. Rex Donasco, presidente sang Association of Stall Owners and Transient Vendors of Iloilo City Public Market, Incorporated (ASTRAVEN), ginapanan-aw na nila nga mapadulong sa privatization ang amu nga plano.

Wala nagasanto suno sa iya ang pahayag nanday Mayor Joe Espinosa kag City Administrator Atty. Hernando Galvez sa mangin kahimtangan sang mga vendors kon ipaidalom sa redevelopment ang merkado.

Kon madayon ang plano, may porsyon gid sang heritage building nga maguba suno kay Donasco. Ginpahayag ni Donasco nga nagakabalaka ang mga vendors kon diin sila mapwesto samtang ginakay-o ang merkado.

Gindayaw ni Donasco ang plano apang mas ginahatagan sang proyoridad ang ipahamtang nga park sa sulod sang merkado kag dugang nga building.

Wala nagapati ang mga vendors suno kay Donasco nga wala sang may ma-displace nga vendors kag indi magsaka ang rental fee sa merkado. Ginakwestiyon ni Donasco kon diin makuha sang igasto ang siyudad kon indi pagpataasan ang rental fee.

Mapadala sang sulat ang ASTRAVEN sa konseho sang siyudad agud ipalab-ot ang ila sentimento. (JoMaque)