PSTMO, naghimo sang pagtuon sa ginaduso nga ATMS sa syudad

Iloilo City — Naghimu sang pagtuon ang Public Safety and Transportation Management Office (PSTMO) sa ginaduso nga Advance Transportation Management and Security Surveillance System ( ATMS) sa syudad.

Suno kay PSTMO Head Jeck Conlu, nagkonsulta sila sa Metro Manila Development Authority (MMDA), traffic engineers kag urban planners agud maka-obra sang ATMS.  Gin-athag ni Conlu nga kalakip sa pagtuon ang pag-survey kag pagtakos sang mga dalan kag pag-kolekta sang mga data.

Suno sa iya, wala lang nagatutok sa traffic management ang ginaproponer nga ATMS kundi mangin sa traffic security kag peace and order situation sang bilog nga syudad. Gin-umpisahan sang PSTMO ang pagpangunsulta para sa ATMS sang nagbulos sa puwesto si Mayor Joe Espinosa kay dismissed Mayor Jed Patrick Mabilog.

Madumduman, ginplano sa tion ni Mabilog ang Intelligent Transport System (ITS) nga may initial budget nga 25 million pesos agud kuntani ipatuman sa Diversion Road, Mandurriao ilabe na sa traffic monitoring kag Speed Limit Ordinance.

Gin-athag naman ni Conlu nga wala nalakip sa ila pagtuon ang kinahanglan nga budget para sa pagpatuman sang ATMS. (JoMaque)