PSUPT Santiago Rapiz nga napatay sa buy bust operation sa Dipolog City, ginlubong na sa Bacolod City
Negros Occidental — Ginlubong na ang police official nga tumandok sang Negros Occidental nga napatay sa buy bust operation sa Dipolog City sang Nobyembre 5.
Madamo ang nagtambong sa paglubong kay the late Police Superintendent Santiago Rapiz sa Roselawn Memorial Chapel sa Bacolod City subong nga hapon.
Apang wala ginhatagan si Rapiz sang military funeral honor kasubong sang 21- gun salute kag wala man sang mga honor guards sa amo nga chapel.
Nagpaathag naman si Bacolod City Police Office Spokesperson Chief Inspector Sherlock Gabana nga wala ginahatagan sang pagpasidungog ang natungdan nga pulis kun may kaangtanan sa kriminalidad ang iya pagkapatay.
Una na ginpahayag ni Senior Superintendent Romeo Caramat Jr, head sang PNP Counter-Intelligence Task Force nga isa si Rapiz sa mga drug protectors ni the late PDEA-identified drug group leader Melvin Odicta.
Dugang diri, protector man si Rapiz sang mga drug personalities sang na-assign siya sa Negros Occidental suno kay Caramat.
Si Rapiz ang pinaka-ulihi nga na-assign nga logistics officer sa Zamboanga Del Norte Police Provincial Office. (JoMaque)