FPOP-Iloilo, handa magpa-athag kag magsabat sa mga pamangkot sang city council angut sa narecord nga mataas nga kaso sang HIV sa syudad

Iloilo City — Handa ang Family Planning Organization of the Philippines –Iloilo nga magpaathag kag magsabat sa mga pamangkot sang city council angut sa narecord nga mataas nga kaso sang Human Immunodeficiency Virus sa syudad.

Suno kay Robert Figuracion sang FPOP- Iloilo, ipaathag nila sa Martes, Nobyembre 27, ang sitwasyon sa syudad kag iban pa gid nga mga lugar sa rehiyon angut sa concern sa HIV.

Ini matapos nagprivilege speech si Councilor Joshua Alim sa session sang city council sang Nobyembre 20 kag ginhatagan atensyon ang narecord nga mataas nga kaso sang HIV sa syudad.

Subong nga bulan, 19 ka bag-o nga mga kaso sang HIV sa syudad ang narecord sang FPOP-Iloilo.

Ini ang magluwas pa sa 719 ka mga kaso sa syudad nga narecord sang Department of Health sugod sang 1986 tubtob Agosto subong nga tuig.

LIBRE NGA HIV-TEST

Naglab-ot sa 45 ang nagpa-HIV test sa FPOP- Iloilo sang Nobyembre 24 kadungan sa kick-ceremony sang sa pagsaulog sang World Aids Day.

Suno kay Figuracion, 36 ka male having sex with other male kag 9 ka transgender women ang nagpaidalum sa HIV test.

Wala nagtuad si Figuracion kun may nagpositibo sa mga natungdan apang nagpabutyag nga mapuslanon gid ang programa.

Magluwas sa libre nga HIV test, nag-conduct man sang lectures sa mga nagpasakop ang FPOP-Iloilo kaupod ang pila ka mga doctor natuhoy sa HIV.

 

(JoMaque/ATT)