Ginkabkab nga karsada sa Tigbauan, gintanuman liwat sang mga pumuluyo

Municipality of Tigbauan – Liwat nga gintanuman sang mga pumuluyo sang puno sang saging, lubi kag balunggay ang ginkabkab nga karsada sa Barangay 8, Tigbauan.

Suno kay Brgy. 8 Punong Barangay Elena Titular, tatlo ka semana na ang nakaligad sang ginbayaan sang contractor ang ginkabkab nga karsada kag wala na ginbalikan.

Gintanuman sang mga pumuluyo ang karsada suno sa punong barangay para gilayon nga ma-aksyonan bangud sang huol nga epekto sini.

Nagakabalaka si Titular sa ikaayong lawas sang mga pumuluyo bangud sang tuman ka baho kag higko nga tubig nga nagtenir sa ginkabkab nga karsada.

Ginpahayag naguba man ang kanal sa lugar kasunod sang construction.

Una nga nangin kontrobersyal ang amo nga proyekto matapos gintanuman sang mga pumuluyo sang balunggay, saging, kapayas kag palma sadtong Oktubre.

EXPIRED NA ANG KONTRATA?

Sandig sa project billboard sang amo nga proyekto, nagtakop sang Oktubre 28, 2018 ang Php 24-Million contract sang Edison Development and Construction.

Sang Hunyo 19 pa nagsugod ang kontrata sang amo nga contractor.

Nagapati naman si Titular nga lain-lain ang contractor nga naga-obra sa proyekto.

Ginpahayag ginpamangkot sang punong barangay ang pinaka-ulihi nga nag-obra kag nagsabat ang natungdan nga lain naman sila nga contractor.

Wala pa nakahatag sang official statement ang 1st District Engineering Office sang Department of Public Works and Highways angut sini. (JoMaque)