1 nakaluwas, 2 missing matapos ginpahayag nga nabungguan sang RORO vessel ang ila sakayan sa kadagatan sang Guimaras

Dumangas, Iloilo— Isa ang nakaluwas, duha ang missing sa pagkawasak sang motobanca nga ginsalakay sang ginapatihan Roro vessel nga halin Bacolod pa-Iloilo sa kadagatan sakop sang Guimaras kagab-i.

Natabu ang insidente las 11 kagab-i sa Iguana Bank sakop sang Guimaras.

Ang survivor nakilala kay Erwin Mansueto, 54-anyos sang Purok Masipag, Punta Taytay, Bacolod City.

May upod pa siya nga duha ka crew nga sanday Lupin Despojo, 40-anyos, boat captain, kag pakaisa ni Lupin nga si alyas Sito, 30-anyos tanan sang Punta Taytay.

Gindala si Mansueto kag ginpaidalum sa medical examination sa Dumangas District Hospital.

As of broadcast time, wala pa nakahibalo ang pamilya ni Mansueto sa natabu sa ila.

Suno kay Mansueto, pirme man sila nagapanagat sa parte sang Guimaras.

Ginpahayag ni Mansueto nga las 9:30 kagab-i sila nag-ariya sang pukot kag las 11 nagapangape sila sang gulpi lang nagbunggo sa ila sakayan ang ulo sang Roro vessel nga wala gid nila nakilala.

Wala nila natalupangdan ang barko bangud nagatalikod sila kag gulpiyada ang pagkatabu.

Halos wala nila nabatyagan ang pagpalapit sang barko bangud sang tuman ka baskog nga hangin.

Wasak gid suno kay Mansueto ang ila sakayan.

Masuwerte nga nakapanguyapot siya sa tarik sang motorbanca.

Sang nakabutwa si Mansueto, nakasinggitanay pa sila sang kapitan pero sang gintawgan niya ini liwat, wala na suno sa iya nakasabat.

Suno kay Mansueto, wala gid sila ginbalikid sang barko.

Malapit tatlo ka oras nga nagpautaw-utaw si Mansueto antes siya na-rescue.

Ala una sang kaagahon, naglabay ang barko sang Montenegro nga halin Bacolod pa-Iloilo nga amo ang nag-rescue sa ila

Naglangoy si Mansueto pakadto sa sanag agud makita siya sang Montenegro.

Nagapadayon naman ang search and rescue operation sang Philippine Coastguard sa duha pa ka missing.

Nagapakig-angut sa sini nga mga tini-un ang Aksyon Radyo Iloilo sa Aksyon Radyo Bacolod agud ma-locate ang pamilya ni Mansueto kag sang duha ka missing. (AGB/MO)