(UPDATE) Grade 7 student sa Sta. Barbara, naghimo-himo lang sang istorya nga gin-‘injectionan’ siya sang tatlo ka nakamaskara nga lalaki base sa imbestigasyon

Sta. Barbara, Iloilo — Indi matuod ang ginsugid sang 13 anyos nga Grade 7 student nga babaye nga gin-injectionan siya sang tatlo ka nakamaskara nga lalaki gani nagpalaminhod ang iya lawas kag nabudlayan siya sa pag-ginhawa kahapon sang hapon, Enero 23.

Naguwa ini sa imbestigasyon sang taga-DSWD kag Sta. Barbara police suno kay Dr. Lourdes Montefrio, Princial III sang Sta. Barbara National Comprehensive High School.

Suno sa principal, na-pressure si alyas KS sang mga ulobrahon sa eskwelahan kag psychologically disturbed man ang estudyante gani nga naghimo-himo siya sang istorya. Pero indi pa gid matul-id kon ano ang problema ni KS bangud nagapabilin pa siya sa ospital.

Sa pihak sini, ma-imbestigar gihapon ang school management suno kay Dr. Montefrio. Nagpasalig si Montefrio nga himuon sang eskwelahan ang tanan nga tikang agud ma-secure ang ila mga estudyante.

Istoryahan man nila kon paano mabuligan si KS kon makaguwa na sa ospital.

Ginsaysay kagab-i ni Joanna, iloy ni KS, nga ginsugid sang iya bata nga may nag-inject sa iya nga tatlo ka nakamaskara nga lalaki samtang nagapungko siya sa bleacher sa eskwelahan gani naglain ang iya pamatyag. Gindala si KS sa Rural Health Unit antes ginsaylo sa ospital kagab-i. (AGB)