Marijuana, makabulig sa mga pasyente kun gamiton sa medical practice–Ilonggo doctor
Iloilo City— Makabulig sa mga pasyente ang paggamit sang medical marijuana.
Ini ang ginpahayag ni Dr. Florentino Alerta kasunod sang pag-aprubar sang Kamara de Representantes sang kontrobersiyal nga medical marijuana bill.
Suno sa iya, kun i-focus lang ang role sang marijuana sa medical practice, madamo gid ang mabuligan nga pasyente.
Ang problema lang suno sa iya kun abusuhon ang paggamit sang marijuana.
May mga components suno kay Alerta ang marijuana nga nagabulig sa mga pasyente kag wala sang mind-altering effect pareho sang Cannabinol (CBN), ang non-psychoactive cannabinoid nga makita sa cannabis.
Tuhay naman ang Tetrahydrocannabinol (THC) nga amo ang nagaresulta sa “pagka-high” sang nagagamit.
Para kay Alerta, welcome development ang pag-aprubar sang Kamara sa hagna. Makabig ini suno sa iya nga medical breakthrough sa pungsod.
Nagapati si Alerta nga madamo ang mabuligan sang medical marijuana ilabe na ang may Alzheimer’s, cancer kag bisan ang mga may AIDS nga nawad-an sang gana sa pagkaun bangud nagasaka ang appetite sang tawo.
Sa boto nga 163 nga pabor, lima nga nagpamatok kag tatlo nga nag-abstain, gin-aprubahan sang Kamara sa third kag final reading ang House Bill 6517 ukon ang Philippine Compassionate Medical Cannabis Act, nga nagatuyo mag-amend sang Republic Act 9165 ukon ang Comprehensive Dangerous Drugs Act of 2002.
Nagatuyo ang hagna nga ma-legalize kag ma-regulate ang paggamit sang medical cannabis para sa mga pasyente kag paghatag sang otoridad sa public kag private research entities nga maghimo sang pagtuon sa medical use sang cannabis.
Ang tikang nagamandu man sa Department of Healh agud mangin principal regulatory agency para sa medical cannabis upod ang Philippine Drug Enforcement Agency (PDEA) bilang monitoring kag regulatory body sa pagpagguwa sang medical cannabis.
Ang hagna nagahatag man sang penalidad para sa makakomiter sang mga prohibited acts.
Sa subong, ang marijuana ginakabig nga prohibited substance pareho sang methamphetamine hydrochloride ukon shabu, cocaine kag heroin sa idalum sang Dangerous Drugs Act of 2002.
Sa idalum sang kasuguan, ang possession sang indi magnubo sa 500 grams sang marijuana, ukon 10 grams sang marijuana concentrate (resin or resin oil), may kabaylo nga penalidad nga life in prison kag multa nga tubtob sa P10 million.
Natalana i-transmit sang Kamara sa Senado ang hagna pero una na nagpadaam si Senate President Vicente C. Sotto III kag iban pa nga senador nga balabagan nila ang hagna.
May mga mamalidha man nga nagpaandam nga ang legalization sang medical marijuana, magabukas sang puwertahan para sa pag-abuso kag addiction nga posible magtuga sang public health emergency sa pungsod.
(AGB/MO via Aksyon Hotline with reports from Business Mirror)