Duha maestro sa Barotac Nuevo, patay matapos nakasagaid sa bus kag nabungguan sang truck ang ila motorsiklo sa Dumangas

Dumangas, Iloilo — Patay ang duha ka maestro matapos nasagairan sang Ceres bus kag nabungguan sang elf truck ang ila ginasakyan nga motorsiklo sa Barangay Balabag, Dumangas kagab-i, Enero 30.

May patal nga pilas sa ulo kag lawas ang mga biktima nga sanday Glenn Dalisay sang Leganes kag Nelson Gatinao sang Anilao, pareho nga maestro sa ISCOF- Barotac Nuevo.

Suno kay PO2 Mike Dumaguin sang Dumangas Police Station, halin sa Barotac Nuevo ang duha kag dul-ong kuntani ni Gatinao sa Leganes si Dalisay.

Ginpahayag nga sang nagsugataay ang motorsiklo kag ceres bus nga ginamaneho ni Rey Estrebillo, nasagairan ang motorsiklo kag nagbalang-balang.

Kasunod sini suno kay Dumaguin, nabungguan sang truck nga ginamaneho ni  Pablo Brasiliso nga nagasunod sa ceres ang motorsiklo.

Lunsay may helmet ang mga biktima pero nawasak ini bangud sa posible impact sang aksidente.

Wasak man ang atubang nga parte sang truck.

Gindala pa ang duha sa Don Jose Monfort Medical Center sa Barotac Nuevo pero pareho nga napatay. (Ariel Solacito)