Estudyante nagreklamo nga ginbagnusan sang maestro sang na-usap na nga bubble gum sa Santa Barbara, Iloilo

ILOILO — Ginreklamo sang Grade 7 student sa Santa Barbara National Comprehensive High School ang iya maestro nga nagbagnus sa iya sang na-usap na nga bubble gum rason nga nabagrasan ang guya sang bata.

Sa panaysayon sang lola ni alyas Nonoy, natabo ang insidente sang Abril 23 sang aga sa second period sang estudyante.

Gin-claim ni Nonoy nga naga-usap sila sang classmate niya nga lalaki sang bubble gum. Suno sa iya, ginlu-ad niya ang iya bubble kag ginhaboy sa bintana sang classroom.

Samtang ang iya classmate naman suno sa iya, ginlu-ad ang bubble gum, gin-roll sa daan nila nga lamesa kag ginlihog siya nga ihaboy ini sa bintana. Apang imbes nga mag-shoot sa bintana, nagtupa ang bubble gum sa ulo sang ila classmate nga babaye rason nga nagpanugid sa ila maestro.

Ginpahayag ni Nonoy nga nagpalapit ang maestro, ginpudyot ang bubble gum kag gulpi lang nga gin-nusnos sa iya baba. May natapik nga mga magagmay nga kahoy sa bubble gum sang gin-roll ini sa daan nga lamesa rason nga nabagrasan ang guya sang tagreklamo.

Nagpanugid naman ang estudyante sa iya lola rason nga ginpa-blotter sa police ang natabo kag ginsugid sa principal.

Ginpahayag sang lola nga naka-istoryahanay na sila sang maestro nga naghinulsol naman sa iya ginhimo.

Sa pagpangusisa naman sang Aksyon Radyo Iloilo news team, nagguwa ang impormasyon nga ginhungod sang tagreklamo nga habuyon sang bubble gum ang iya classmate nga babaye. Nagguwa man nga iya ni Nonoy ang ginhaboy nga bubble gum kag indi iya sang classmate niya nga lalaki.

Lima ka mag-ulutod kanday Nonoy. Yara sa Negros Occidental ang iya iloy kag nagasakay naman sa barko ang iya amay.

Nagatenir sa iya lola ang estudyante.

Wala na sang plano nga mag-file sang reklamo ang pamilya batok sa maestro.

Ipaidalum naman sang Schools Division of Iloilo sa psychosocial intervention ang Grade 7 student. — via Aksyon Hotline