Pagbutang sang campaign posters sa mga PUVs, ginapasugtan pero dapat magsunod sa guidelines sang Comelec –Provincial Election Supervisor

Iloilo City – Wala sang problema kon may itakod nga campaign posters sa mga Public Utility Vehicles (PUV’s) sang mga kandidato nga nagapadalagan sa May 13 midterm elections.

Suno kay Provincial Election Supervisor Atty. Robert Salazar, kinahanglan nga mag-comply ang PUV’s sa gintalana nga guidelines sang Commission on Elections ilabe na ang kadakuon sang campaign posters.

Base sa Comelec regulations, nagakadapat nga indi maglapaw ang kadakuon sang posters sa 2×3 feet samtang ang sticker size naman ang indi maglapaw sa 8.5×11 inches.

Kakason sang taga-Comelec suno kay Salazar ang posters kon nagalapas sa ila pagsulundan kag makabig man nga paglapas sa franchise sang PUV’s nga posible magresulta sa penalidad.

Indi naman makatakud sang campaign posters sa government-owned vehicles lakip na sa mga MRTs kag LRTs.

Ginpasiguro si Salazar nga sige-sige ang Operation Baklas sang ahensiya upod ang police kag local government units sa mga illegal campaign materials. (JoMaque)