15-anyos nga estudyante, nag-claim nga puwersa siya ginpasakay sa van sa Arevalo kag gindala sa isa ka banwa sa probinsiya pero nakapalagyo; Solterito, nag-ako nga himu-himo lang niya ang istorya bangud sang ‘Momo Challenge’

Arevalo, Iloilo City –(UPDATED)

“May 30 pa gid ka bata sa balay kag nagalinapta ang internal organs.”

Ini ang ginsugid sang 15-anyos nga estudyante sa iya iloy matapos siya nakapalagyo sa balay nga gindal-an sa iya.

Nagakulurog sa kakulba nga nagapanugid ang solterito sa iya pamilya sang nakapauli siya pasado las dose kaina sang kaagahon, Marso 1.

Ginkapuhag ini sang mga pulis sa Arevalo kag nagpakig-angut sa mga pulis sang banwa nga ginpahayag gindal-an kag gin-agyan sang solterito.

Sa alegasyon sang solterito, ginkuha siya sang mga sakay sa van samtang nagapakadto siya sa eskwelahan kahapon sang aga, Pebrero 28.

Base sa panaysayon sang soterito, nagalakat siya padulong sa eskwelahan sang gindulogan sang puti kag itom nga van kag may babaye nga nagpamangkot kon diin mahimo makakaon.

Ginpasakay siya sang babaye sa van kag iya nakita ang 12 ka iban pa nga kabataan sa sulod nga nagahilibi-un.

Suno sa iloy base man sa ginsugid sang bata, may nagpanaog nga lalaki kag gintayaan sang kutsilyo rason nga nagsulod ang iya bata sa van.

Gin-alegar sang bata nga gindala sila sa isa ka banwa sa probinsiya.

Ginpasulod sila sa daku nga balay kag iya man nga nakit-an ang ginabanta 30 ka iban pa nga kabataan sa sulod.

Magluwas dire, nakita man niya suno sa iya sa sulod sang balay ang mga internal organs sang tawo nga nasulod sa plastic.

Dugang pa sang solterito nakakuha sila sang tsansa upod ang duha ka bata nga lalaki nga taga-Lapaz kag nakapalagyo pinaagi sa paglumpat sa bintana sang CR sang balay.

Nagbulagay lang sila sang duha pa ka bata sa terminal na sa siyudad.

Suno pa sa iya, ila lang ginlakat halin sa amu nga banwa padulong sa siyudad sang Iloilo.

Gilayon siya nga nagpanugid sa iya iloy kag nag-report sila sa Arevalo police.

Natultolan naman sang mga pulis ang balay nga gindal-an sa mga kabataan.

Ginpahayag naman sang iloy nga na-trauma ang iya bata sa natabu.

‘GINDAL-AN NGA BALAY’

Las singko kaina sang kaagahon, Marso 1, natultulan sang mga pulis ang balay nga ginpahayag gindal-an sa solterito sa Consolacion, San Miguel.

Mismo si Toto ang nagtudlo sa mga pulis sang amo nga balay.

Ginapabantayan suno sa iya ang balay sang armado nga lalaki.

Nakibot ang mga tawo sa gina-construct nga balay sang nag-abot ang mga pulis.

‘MOMO CHALLENGE’

Nag-aku sang ulihi ang solterito nga kabutigan lang ang tanan.

Suno kay Alyas Toto, epekto sang ‘Momo Challenge’ ang iya ginhimo.

Ginsugo siya suno sa iya sa “Momo Challenge” nga magdalagan halin sa ila balay sa Arevalo padulong sa Hibao-an, Mandurriao kag magbalik sa ila balay kag magpalipong-lipong.

Nagpangayu sang pasaylo si Toto sa mga pulis sa iya ginhimo.

Dugang ni Toto, nahadlok siya nga mapatay kon indi pagtumanon ang ginasugo sa iya sa “Momo Challenge.” (JoMaque)