OIC sang WVMC, gintawag nga butigon ni Councilor Plaridel Nava matapos iya ginreklamo nga wala gilayon nakahatag sang ‘medical certificate’

Iloilo City — Butigon si Dr. Ma. Cristina Woo, officer-in-charge sang Western Visayas Medical Center suno kay councilor Plaridel Nava.

Ini matapos ginpahayag ni Dr. Woo nga medico legal certificate ang ginpangayo sang asawa ni Councilor Nava matapos ginpakonsulta ang ila bata sang Sabado, Marso 23.

Suno sa konsehal, nagpahibalo na ang iya asawa sa personnel sang WVMC sang Marso 23 nga mangayo sila sang medical certificate apang ginpanugyanan nga magbalik lang sang Lunes, Marso 25.

Lakip ang medical certificate suno kay Councilor Nava sa mga dokumento agud mapasaka ang kaso batuk sa mga suspects nga naghaboy sang bato sa balay sang iya asawa sa Oton sa diin naigo sa ulo ang ila bata.

Una na ginpahayag ni Dr. Mae Lyn Acebuque, head sang Out Patient Department sa WVMC, nga wala nakapangayo sang medical certificate ukon medico legal certificate ang asawa ni Councilor Nava sang ginpakonsulta ang iya bata sang Marso 23.

PWEDE MAGAMIT SA KORTE

Mahimo magamit sa korte ang medical certificate kag medico legal certificate suno kay Judge Victorino Maniba Jr., spokesperson sang Iloilo Hall of Justice.

Una na ginpahayag ni Dr. Woo nga ang medico legal certificate ang gina-issue nila kun gamiton ini sa legal nga mga transaksyon.

Mahimo naman maka-issue sang medical certificate ang tanan nga doktor sa ospital. (JoMaque)