DILG Central Office, wala pa sang legal advice sa status ni Janiuay Mayor-elect Frankie Locsin

By: JoMaque| June 29, 2019, 10:34 AM

Iloilo City – Hulaton sang DILG 6 ang Hunyo 30 kon ano ang mangin tikang sa sitwasyon sa Janiuay, kasunod sang pag-aresto sang NBI kay Mayor-elect Frankie Locsin sang Hunyo 3 bangud may arrest warrant halin sa Sandiganbayan sa kaso nga graft and corruption.

Suno kay DILG 6 Director Ariel Iglesia, wala pa nakahatag sang legal advice ang ila central office.

Indi pa maathag kon ma-apply ang rule of succession sa pagsugod sang bag-o nga set sang mga municipal officials samtang wala pa sang advice halin sa DILG central office.

Naka-hospital arrest si Locsin bangud sa tatlo ka balatian suno sa NBI.

MANDU SANG SANDIGANBAYAN

Nagpaguwa sang mandu ang Sandiganbayan First Division sang Hunyo 10 para sa chief sang Western Visayas Medical Center nga i-examine si Locsin kada semana agud mahibaluan ang iya medical status, kag magpadala sang verified report sa korte sa sulod sang tatlo ka adlaw matapos nabaton ang order.

Madumduman nga sang gindakup si Locsin sang Hunyo 3 ginpa-idalum siya sa medical exam sa WVMC, pero nagdesisyon ang pamilya nga isaylo siya sa The Medical City.

Suno kay NBI 6 Executive Officer Atty. Ramilo Quinto, padayon nila nga ginabantayan si Locsin.

Ginconfirmar man ni Quinto nga gin-operahan sang nagligad nga semana si Locsin.