Lalaki nga nagtambag sa inaway sang mag-utod, natiruhan sa Lambunao

By: JoMaque | August 26, 2019, 1:50pm

Lambunao, Iloilo— Pilason ang 28-anyos nga lalaki matapos natiruhan sang nagtambag sa inaway sang mag-utod sa Barangay Tubungan pasado ala una kaina sang kaagahun, Agosto 26.

Suno kay Police Staff Sergeant Jessie Fusin, imbestigador sa Lambunao Police Station, gingubat sang suspetsado nga si Joemarie Mandate, 37-anyos, ang iya 35-anyos nga manghod nga si Joebert rason nagtambag ang biktima nga si Dave Gonzales.

Si Gonzales ang live-in partner sang manghod sang mag-utod nga Mandate.

Gilayon naman nga gindala sa ospital si Gonzales bangud sang pilas sa wala nga abaga, wala nga paa kag tuo nga tiil.

Madasig nga nagpalagyo ang suspetsado nga naka-inom sang nagluntad ang insidente.

Narecover sa crime scene ang 12 gauge shot gun nga ginapatihan gingamit sa krimen kag isa ka empty shell.

Sa imbestigasyon sang pulis, wala sang daan nga hiligut-anun ang mag-utod nga Mandate apang masami nga nagapanggarit-garit ang suspetsado sa iya mga utod kun maka-inom