“Basura Baylo Bugas” nga programa, ginlunsar sang Dumangas LGU

By: Aine Grace Bravo | October 2, 2019

via KhenJo Terco

Dumangas, Iloilo — Naglunsar sang proyekto nga “Basura Baylo Bugas” ang local government unit sang Dumangas subong nga adlaw.

Ini nga proyekto ang inisyatibo sang mga municipal officials sa pagpanguna ni Mayor Ronaldo Golez bilang kabahin sang ila kampanya sa solid waste management.

Pwede mapabayluhan sang isa ka kilo nga bugas ang kada kilo sang plastic nga basura nga matipon sang mga pumuluyo.

Kinahanglan lang nga magtipon sang plastic nga basura pareho sang candy wrappers, shampoo sachets, putos sang kape kag iban pa kag isulod sa mga plastic bottles antes pabayluhan sa banwa.

Makit-an sa lobby sang munisipyo ang redemption center.

Ipaagi naman sa shredder ang mga matipon nga plastic kag i-impon sa pagahimuon nga mga concrete blocks nga ginabutang sa mga footwalks.

Halin sa mga ginbakal sang banwa sa mga local farmers ang ipangbaylo nga bugas.