Former PNP Chief Gen. Oscar Albayalde, posible mapreso bangud sa ‘ninja cops’ issue

By: Aine Grace Bravo | October 18, 2019

via DZRH

Manila — Magapangatubang sang posible nga life imprisonment si anay PNP Chief Gen. Oscar Albayalde kun mapasakaan siya sang kaso sa isyu sang ‘ninja cops’kag mapamatud-an nga guilty.

Sa rekomendasyon sang Senate committees on justice kag blue ribbon nga ginapamunuan ni Sen. Richard Gordon, ginabilin sa Department of Justice (DOJ) kag Ombudsman ang pagpasaka sang kaso batuk kay Albayalde.

Ginpaguwa subong nga hapon ni Gordon ang partial report sang ginhimo nga imbestigasyon sang iya komitiba angut sa isyu.

Ginrekomendar sang Senado ang pag-file sang kaso nga paglapas sa Anti-Graft and Corrupt Practices Act kag Republic Act 9165 ukon Dangerous Drugs Act.

Gin-athag ni Gordon nga wala sang direkta nga ebidensya nga nagadalahig kay Albayalde sa isyu, pero mabaskug ang circumstantial evidence nga gintabunan niya ang iya mga anay tinawo nga ginapamunuan ni PMAJ Rodney Baloyo sa kontrobersiyal nga anti-illegal drug operations sa Pampanga sang 2013.

Nabutang ang rekomendasyon sa 49-page committee report nga papirmahan ni Gordon sa mga miembro sang komitiba.

Hatagan man sang kopya sang report si Presidente Rodrigo Duterte.