Anti-Modified Muffler sang Iloilo City, wala gid napatuman sugod sang gin-aprobahan sang 2017 — ex-Councilor Joshua Alim

By: JoMaque | Oktubre 24, 2019, 11am

Iloilo City — Wala sang ideya si anay City Councilor Atty. Joshua Alim kun ngaa wala ma-implementar tubtob subong ang Anti-Modified Muffler Ordinance nga iya gin-author.

Suno kay Alim, na-aprubahan ang ordinansa sang 2017 sa panahon pa ni anay Mayor Jed Patrick Mabilog, kag na-publish man.

Na-istorya pa ni Alim si Public Safety and Transportation Management Office (PSTMO) Head Jeck Conlu antes natapos ang iya termino kag ginpahibalo nga may pribado nga tawo nga madonar sang gadget nga magatakus sang decibel ukon gahud sang mga tambutso.

Sakup sang ordinansa suno kay Alim ang tanan nga salakyan nga nagagamit sang modified muffler, kag indi lang ang mga motorsiklo.

Naunahan pa sang iban nga banwa ang syudad sa pagpatuman sang ordinansa batuk sa magahud nga tambutso.

Sang damlag lang, 91 ka open pipe nga tambutso nga nakumpiskar sang Barotac Nuevo police sa ginapatuman nga ordinansa sang banwa ang ginpalapakan sa pison agud indi na magamit.