Mindanao, liwat gin-igo sang mabaskog nga linog; 3, gin-report nga patay

By: Aine Grace Bravo | October 31, 2019

via CNN PH

Liwat nga gintay-ug sang mabaskog nga linog ang Mindanao kaina sang aga.

Suno sa Philippine Institute of Volcanology and Seismology ukon Phivolcs, magnitude 6.5 earthquake ang na-record las-9:11 sa Tulunan, North Cotabato, sa pareho man nga area nga gin-igo sang magnitude 6.6 nga linog sang Martes kag magnitude 6.3 duha ka semana ang nakaligad.

Intensity VII ang nabatyagan sa Tulunan; Kidapawan City; Sta. Cruz, Matanao, Bansalan, kag Magsaysay sa Davao del Sur.

Intensity VI ang na-experyensyahan sa Tampakan, South Cotabato.

Tatlo ang gin-report nga napatay sa Makilala, North Cotabato suno sa Department of Social Welfare Development.

Ginpahayag ni Phivolcs Science Research Specialist Erlinton Olavere nga indi aftershock sang magnitude 6.6 kag magnitude 6.1 ang pagtay-ug kaina sang aga.

Posible suno kay Olavere nga may mga linog pa nga mabatyagan sa masunod nga inadlaw.

Lima ka aktibo nga faults sa lugar ang nagatuga sang mabaskog nga mga linog suno sa Phivolcs.

13 na ang gin-report nga napatay sa sunod-sunod nga mga linog sa nakaligad nga duha ka semana.