(Updated) Negosyante, patay sang gintiro sa City Proper; pagpanghold-up, ginasunod nga anggulo sa krimen

By: Aine Grace Bravo, Aksyon Radyo Iloilo

ILOILO CITY, (Updated at 3pm, Nov. 13, 2020) – Dead-on-arrival sa ospital ang negosyante nga gintiro sa Iznart Street, City Proper kagab-i, Nobyembre 12.

Ginkumpirmar ini ni PMAJ Francisco Paguia, hepe sang Police Station 1.

Suno kay Paguia, may pilas sa tangkugo lapos sa agtang ang biktima.

Kaina sang kaagahon lang na-establisar ang identity sang biktima paagi sa iya mga tinawo, pero nagpamalibad ang kapulisan nga maghatag sang pangalan santu man sa pangabay sang pamilya.

Pagpanghold-up ang ginasunod sang kapulisan nga motibo sa krimen.

Suno kay Paguia, nadakpan nila ang 16-anyos nga lalaki nga nagserbe lookout kag amo ang nag-ako nga gintuyo nila i-holdap ang biktima.

Tumandok sang Barangay Nonoy, City Proper ang 16-anyos nga may live-in partner kag may duha ka kabataan.

Ginkumpirmar man ni Punong Barangay Evanjoe Anonoy sang Nonoy, City Proper nga tumandok sang ila lugar ang gintudlo nga gunman nga ginkilala kay alyas Hapon, ginabanta sa 35 tubtob 37 anyos kag may record na sang pagpangawat.

Ginpahayag sang kapitan nga may nakakita nga may bata nga nagadalagan sa ila barangay kagab-i nga may bitbit nga sling bag.

Base sa impormasyon, gin-agaw sang mga suspetsado ang sling bag sang biktima kag wala pa na-recover tubtob subong. | via FIRINGLINE/HOTLINE