28 COVID-19 cases, na-record sa Brgy. Nabitasan, La Paz
Iloilo City — Na-record ang 28 ka COVID-19 cases sa Brgy. Nabitasan, La Paz.
Ini ang ginkumpirmar ni Punong Barangay Barbara Joy Aroza.
Ginpahayag ni Aroza nga nag-umpisa ini sa gin-operahan nga babaye nga nagpositibo sa COVID-19.
Gilayon ginpaidalum sa RT-PCR test ang lima ka upod niya sa balay kag tatlo ang nagpositibo.
Ginpaidalum man sa RT-PCR test ang 30 ka mga gin-identify nga naka-close contact sang babaye kag 17 diri ang nagpositibo.
Nagatenir sa isa lang ka compound ang mga naka-close contact sang babaye.
Gin-reswab naman makaligad sang lima ka adlaw ang una na nga nag-negatibo sa test, kag duha diri ang nagpositibo sa COVID-19.
Dugang ni Aroza, may lima naman nga nagpositibo nga naghalin sa guwa sang compound.
Naka-quarantine na ang mga nagpositibo kag gin-lockdown ang compound.
Ginpabutyag ni Aroza nga gina-disinfect man sang mga naga-istar sa compound ang ila nga lugar.
Ginpahanumdom ni Punong Barangay Aroza ang mga resiente nga magsunod sa minimum public health standards| via PMReports