4 new Delta variant cases sang COVID-19, na-record sang DOH 6 sa Western Visayas

Naka-detect ang Department of Health 6 sang apat ka bag-o nga kaso sang Delta variant sang COVID-19 sa Western Visayas subong nga adlaw base sa ginpagguwa nga resulta sang Philippine Genome Center.

Suno kay Dr. Helen Tobias, asst. regional director sang DOH 6, tatlo diri ang local cases kag isa ang Returning Overseas Filipinos.

*56-ANYOS NGA BABAYE NGA TAGA-PANDAN, ANTIQUE

Hulyo 8 sang gin-admit siya sa Western Visayas Medical Center kag gin-discharge sang Hulyo 19 sang nagnegatibo na ang iya RT-PCR test result. Matandaan nga sa Pandan, Antique man na-record ang pinakauna nga kaso sang Delta variant sang COVID-19.

*30-ANYOS NGA LALAKI NGA TAGA-MANDURRIAO, ILOILO CITY

Nagpakonsulta siya bangud nakitaan sang sintomas sang COVID-19. Duha ka beses siya nga gin-swab kag positibo ang resulta. Una siya nga nag-home quarantine apang gilayon man nga ginsaylo sa quarantine facility sang siyudad.

*32-ANYOS NGA BABAYE, DIALYSIS PATIENT NGA TAGA-CABATUAN, ILOILO (NAPATAY)

Hunyo 28 sang gin-admit siya sa ospital kag gin-discharge man sang nagnegatibo na sa virus. Liwat siya nga gindala sa ospital sang Hulyo 27 sang naglain ang iya pamatyag kag napatay subong nga adlaw, Hulyo 29.

*46-ANYOS NGA ROF NGA TAGA-BAROTAC NUEVO, ILOILO

Ginahibalo pa ang iya nga travel history. Yara pa sa Manila ang pasyente kag wala pa makapauli sa Iloilo.

Sa kabug-usan, may anum na ka Delta variant sang COVID-19 sa rehiyon 6 as of July 29.