Masobra tunga sa milyon nga balor sang suspected shabu, nakumpiskar sa anay seaman sa Leganes

ILOILO — Naglab-ut sa P544,000 nga balor sang suspected shabu ang na-recover sa anay seaman nga subject sa drug buy bust operation sa Brgy. Lapayon, Leganes kagab-i, Agosto 31.

Ginkilala ang subject kay Jeffrey Gustilo, 33-anyos sang Brgy. Poblacion Leganes.

Suno kay Police Staff Sergeant Emmanuel Maudi, imbestigator sang Leganes Police Station, downline ni Gustilo ang nadakpan sadto nga SK chairman sa buy bust operation sa La Paz.

Ginakabig si Gustilo nga High Value Individual (HVI) kag masobra isa ka bulan gin-monitor antes gin-operate.

Na-recover sa subject ang anom ka sachet sang suspected shabu nga ginabanta nagabug-at sang 80 gramos kag P7,500 nga buy bust money.

Ginatinguhaan sang Aksyon Radyo news team nga makuhaan sang pahayag ang subject.