Lalaki nga ginpahayag may kuyap, patay sang nalumos sa Lapuz

ILOILO CITY – Patay na sang nasapwan ang lalaki nga ginpahayag nalumos sa creek nga sakop sa Barangay Loboc, Lapuz kahapon, Oktubre 18.

Ginkilala ni Police Staff Sergeant Jennifer Espora sang La Paz Police Station kay Chenard Borromeo, 22, kag residente sang Barangay Lapuz Norte, Lapuz ang bangkay.

Ginpahayag nga may kuyap si Borromeo, suno kay Espora, base sa impormasyon nga nakuha nila sa pamilya.

Base sa initial nga imbestigasyon sang La Paz police, posible nga gin-atake sang kuyap samtang nagapanguha sang sisi sa lugar pasado las-12 kaina sang udto si Borromeo antes siya nalumos.

Gindala pa siya sa ospital pero wala natabangan.

Gina-imbestigaran pa sang La Paz police agud matul-id kun ano gid ang ginkamatay ni Borromeo.