‘I will suspend it forever’ — Iloilo City Mayor Jerry Treñas kun indi pag-aprubahan sang DOTr ang LPTRP sang siyudad

Permanente nga untaton ni Mayor Jerry Treñas ang Local Public Transport Route Plan (LPTRP) sang Iloilo City pananglitan nga indi pag-aprubahan sang Department of Transportation.

Suno sa alkalde, nakadepende na ang sabat sa DOTr kun aprubahan pa ang LPTRP sang Iloilo City. Ginpahayag man niya nga naga-implement lang ang Local Government Unit (LGU) sang programa sang national government.

“We are trying our best to make it [LPTRP] palatable to our people, pero indi naman na ‘ya puwede nga nagabalabag sa tutunlan sang tawo idasok ta pa,” suno kay Treñas.

Una na nga ginkumpirmar ni Public Safety and Transportation Management Office (PSTMO) head Jeck Conlu nga mapadulong sila sa Central Office sang DOTr agud nga mapresentar sang personal ang LPTRP sang syudad.

Hunyo 12 subong nga tuig sang ginpatuman ang LPTRP pero gin-ulan sang pagpakamalaut sang publiko rason nga gin-suspend sang Hulyo 8 tubtob nga ginpalawig pa ang suspension sa katapusan sang tuig.