Natipon nga bulig sang Aksyon Radyo Iloilo para sa pamilya sang ginpatay nga 6 ka tuig nga bata nga babaye sa Estancia gindul-ong sa pamilya Mahinay

ILOILO — Gin-turn over na sang mga personnel sang Aksyon Radyo Iloilo ang mga natipon nga kwarta halin sa mga tagpalamati kag Facebook followers sang estasyunan para sa pamilya Mahinay kaina sang udto.

Nagpadulong sa Brgy. Gogo, Estancia ang mga personnel sang Aksyon Radyo Iloilo agud magdul-ong sang dugang nga bulig sa pamilya ni Jacqueline, nga ginpatay kag nasapwan nga wala na sang pang-idalum nga panapton sang Disyembre 19 sang gab-i.

Nagapasalamat naman si Joven sa tanan nga nagbulig agud nga mapalubong ang iya bata kag para sa kinahanglanon sang ila pamilya.

As of 1pm sang December 29, naglab-ut na sa P64,190 ang kabug-usan nga natipon nga kwarta sang Operation Bulig nga ginlunsar sang estasyunan.

Sa amu nga kantidad, una na ginpadala ang P10,000 sa pamilya sang Disyembre 23.

Una na nagprangka si Joven nga wala sila sang ikasarang nga ipalubong ang iya bata bangud pagbiyahe lang sang tricycle ang iya ginakuhaan sang kita kag wala naman sang trabaho ang iya asawa.

Ginpahayag ni Joven nga may ginhatag man nga bulig ang ila mga barangay officials sa ila pamilya.