Masobra 200 ka balay nasunog sa West Habog-Habog, San Juan sa Molo

ILOILO CITY – Aga pa nga ginpuhag sang daku nga sunog ang boundary sang West Habog-Habog kag San Juan, Molo kaina.

Suno kay Senior Fire Officer 1 Jake Ronald Solis sang BFP- Iloilo City, pasado las-kuwatro nila nabaton ang fire call kag las-6:16 gindeklarar nga fire out. Base man sa initial nga pagpangusisa sang BFP, nagsugod ang kalayo sa balay sa West Habog-Habog.

Sa data naman sang City Social Welfare an Development Office as of 9:50 kaina sang aga, 172 ka households sa West Habog-Habog kag 62 sa San Juan ang apektado sang sunog.

Nagapadayon suno kay CSWDO head Terry Gelogo ang ila ginahimo nga validation para ma-identify kun pila ang totally damaged kag partially damaged nga mga balay.

Ginhimo nga evacuation center ang 21 ka classrooms sa Baluarte Elem. School para sa mga nasunugan sa West Habog-Habog, kag 13 ka classrooms sa San Juan Elem. School para sa mga nasunugan sa San Juan.

Pito ka community kitchens naman ang gin-mobilize sa West Habog-Habog kag apat sa San Juan.