Mga kooperatiba, transport groups sa Western Visayas indi mag-upod sa nationwide week-long transport strike

Indi mag-intra ang mga transport group kag mga kooperatiba sa Western Visayas sa nationwide nga week-long transport strike nga ginaplano sang grupo nga Manibela.

Suno ini kay Mr. Rizal Alido, chairman sang sang Western Visayas Federation of Transport Cooperative and Corporation base sa ila nakasugtan sa ila emergency meeting kahapon.

Una na ginkumpirmar ni Alido nga ang iya lang ginapamunu-an nga kooperatiba nga ICAODTC ang indi pabor sa isa ka semana nga untat-byahe.

Wala man nagpabor sa transport strike si Western Visayas Transport Cooperative Pres. Boyet Parcon.

Suno kay Alido, sala ang gina-claim sang Manibela kag iban pa nga mga transport group nga kulang ang tyempo nga ginhatag para sa mga kooperatiba nga maka-secure sang modernized jeepney units. 2017 pa suno sa iya sang ginsuguran ang PUV Modernization Program sa pungsod kag nagapati si Alido nga bastante na ini para makatipon sang modernized jeepney unit ang isa ka kooperatiba.