Fetus nasapwan sa sulod sang basurahan sa Molo

ILOILO CITY — Nakasulod sa plastic kag ginhaboy sa basurahan ang fetus sa Brgy. San Pedro, Molo kahapon sang aga, May 27.

Suno kay Encarnacion Eguico, residente nga una nakakita kag tag-iya sang basurahan, ginbukad niya ang plastic nga yara sa pinakababaw kag natukiban nga may nakasulod nga underwear sang babaye, sanitary pad kag fetus nga daw kamalagko ka daku.

Dugang ni Eguico, may dugo pa ang mga panapton gani posible kaina sang aga lang ginhaboy.

Ginpabutyag man ni punong barangay Karl John Lapascua nga may menor-de-edad nga nakakita sa isa ka babaye nga nagabitbit sang kapareho nga plastic sa diin nakita ang fetus kag naghaboy sa basurahan.

Dugang sang punong barangay, pamisahan kag ipalubong na lang nila ang nasapwan nga fetus.

Gina-check man nila suno kay Lapascua ang mga CCTV cameras agud ma-identify kun sin-o ang naghaboy.