Retired seaman nasapwan nga patay sa sulod sang iya balay sa Dumangas

ILOILO–Nasapwan nga patay sa sulod sang iya balay ang retired seaman nga ginkilala kay Cezar Dipus, Jr. 47-anyos sang Brgy. Pagdugue, Dumangas kaina sang aga.

Nakita ang bangkay ni Dipus sang may naglabay sa iya balay pasado las 6 kaina sang aga kag natingala nga bukas na ang pwertahan.

Nasapwan si Dipus sa folding bed nga duguon.

Suno kay Pagdugue Punong Barangay Rufina Funa nga posible ginsipa ang pwertahan sang balay ni Dipus tungod guba na ang lock

Mabuot suno sa iya ang lalaki kag wala sang record sa ila barangay nga may naakig ukon kontra si Dipus. Yara sa Manila ang pamilya ni Dipus.

Ginkumpirmar sang hinablos nga si Angelo Velasco, nga retired seaman ang iya tiyo.

Nagatulog siya sa balay sang iya tiyo kun magpuli siya halin sa trabaho

Nagapati ang hinablos nga ginsulod sa balay ang iya tiyo kag ginpatay tungod nagkiwi suno sa iya ang lock sang pwertahan

Wala naman sang may nadula sa balay sang biktima.

Sa impormasyon sang Aksyon Radyo Iloilo halin sa Dumangas police, may witness nga nakakita sa mag-amay nga Jesus Dipus kag Jesus Dipus, Jr. nga naghalin sa balay sang biktima

Nakita man sila nga naglakat pa-highway kag nagsakay sa bus pakadto sa siyudad sang Iloilo.

Ginpahayag ni PMSgt Terrence John Soria sang Dumangas MPS nga daan nga hiligut-anon ang ginasunod nila nga motibo sa insidente.

Indi naman ma-detalye ni Soria kun ano ang gin-awayan sang suspek kag sang biktima sadtu.

Daku ang tsansa suno sa iya nga ang mag-amay ang suspek sa krimen.

Nagpadulong ang Dumangas police sa lugar nga ginakadtuan sang mag-amay apang wala nila makita,

Ginkumpirmar niya nga himata sang biktima ang mga suspek.