Amay ni Alajendro Panes, Jr. nga gintiro sa Molo daku ang pasalamat sa kapulisan sa pagkadakup sa mga suspects

ILOILO — Daku ang pasalamat ni Alejandro Panes sa maabtik nga paghulag sang kapulisan agud nga madakpan ang mga suspects sa pagtiro-patay sa iya bata nga si Alejandro, Jr. sa Avanceña St., North Fundidor, Molo kahapon sang kaagahon.

Las-kwatro kaina sang kaagahon gintawgan sang police ang amay nga nag-conduct sila sang follow-up operations nga nagresulta sa pagkadakup sa mga suspetsado.

Kumbinsido ang pamilya sa identity sang mga nagkaladakpan apang indi nila personal nga kilala.

Gin-ako ni Alejandro nga wala na sila naglaum nga masolbar ang natabu sa iya bata gani nakibot siya nga may madasig nga development sa kaso.

“Ako tani daw medyo nadulaan na sang pag-asa pero ginpabilib gid ko sang Molo Police. Kanami sang ila performance. Indi takos ang akon pagpasalamat sa ila sakripisyo, pulaw bugtaw agud masolbar ang ini nga kaso,” pahayag pa ni Alejandro Panes.

Ginaproseso na lang sang pamilya nga mahatagan sang maayo nga lubong ni Alejandro, Jr.

Natalana nga ihamyang ang bangkay ni Alejandro, Jr. sa Gegato-Abecia Columbarium sa Tanza, City Proper buwas kag posible ilubong sa Hulyo 19.

Background : http://bit.ly/46MsnYW