2 ka persons of interest nga naghaboy sang granada sa kilid sang Dingle Municipal Library na-assign sa FFSU sang Phil. Army sa Camp Delgado
Na-assign sa 6th Forward Service Support Unit (FSSU) Battalion nga naka-base sa Camp Delgado sa siyudad sang Iloilo ang duha ka persons of interest nga gintumod sang Dingle police nga amo ang naghaboy sang granada sa karsada malapit sa Municipal Library sang Dingle, kaagahon sang Oktubre 3.
Pero naga-duty sa isa ka unit sa Camp Fernandez sa Dingle ang duha, kag nagabantay sa opisina kun diin ginatago ang mga pusil kag magazine sang mga katapo sang 301st Brigade.
Ini ang ginkumpirmar ni Lieutenant Colonel J-Jay Javines, chief sang 3rd Division Public Affairs Office sang Philippine Army.
Indi pa paghingadlan sang otoridad ang duha pero Private 1st Class kag Staff Sergeant ang ila rangko.
Suno kay Javines, wala sang pag-ako sa bahin sang duha ka persons of interest sa alegasyon batok sa ila.
Nagpabutyag pa ang duha nga sila ang nag-report sa police sang insidente, suno kay Javines.
Base sa record sang CCTV camera nga ginagamit bilang ebidensya sang Dingle Police, positibo nila nga gin-identify nga ang duha ka ginatumod miyembro sang 6th FSSU ang sa likod sang paghaboy sang granada.
Nagaguwa man sa CCTV footage nga ang ang isa sa duha ka persons of interests naka-uniporme pa nga iya sang Philippine Army.
Ginpabalik na sa ila kampo sa 6th FSSU ang duha kag ginpaidalum sa restrictive custody.
Naga-coordinate naman ang 3rd Infantry Division sa opisina sang 6th FSSU para sa imbestigasyon kag ginahulat ang mangin resulta sini, suno kay Javines.
Kun mapamatud-an nga ang duha ka persons of interest ang naghaboy sang granada sa Municipal Library sang Dingle, posible sila ma-aresto sang police kun may warrant of arrest. Kun makasuhan kag ma-convict, mahimo makakas sa serbisyo ang duha, suno pa kay Javines.
