Babaye pilason sang ginbuno sang iya live-in partner sa lodging house sa La Paz
ILOILO CITY — Lima ka pilas sa tiyan kag duha sa wala nga butkon ang naagum sang 33-anyos nga babaye sang ginbuno sang iya live in partner sa sulod sang lodging house sa La Paz kagab-i, Pebrero 11.
Ginkilala ang suspect kay alyas Arnold, 42-anyos nga taga-Alalasan, Lapuz samtang ang biktima naman ang ginkilala kay alyas Grace nga taga-Nabitasan, La Paz.
Gilayon nga gindala sa ospital ang biktima samtang yara na sa custody sang police ang suspetsado.
Sa impormasyon nga nakuha sang Aksyon Radyo Iloilo, bag-o lang nakapauli halin sa Saudi ang biktima.
Ginpahayag naman sang suspect nga buwas na ang iya kaadlawan gani nag-check in sila sang iya live-in partner agud mag-celebrate.
Dugang pa sang suspect, nagbaisay sila sang biktima may kaangtanan sa kuwarta nga ginpadala sa iya sang iya live-in partner.
Ginkwestiyon niya kun ngaa sa apat ka bulan nga obra sa Saudi sang iya ka-live in, lima ka libo lang ang iya nga napadala.
Gin-insister naman sang biktima nga kada bulan siya nagapadala sang kuwarta tubtob nga wala sila mag-intindihanay nga duha nga nagresulta sa pagpangbuno.
