Pusil, bala kag suspected shabu na-recover sa drug buy bust operation sa Dumangas

ILOILO — Dakup ang street level individual sa drug buy bust operation sa Barangay Dacutan, Dumangas la-1:45 kaina sang hapon.

Suno kay Police Major Kenn Albert Lepsia, hepe sang Dumangas Municipal Police Station, naglab-ot sa apat ka semana ang ila monitoring sa subject nga si alyas Fred, 37-anyos, sang amo nga barangay antes nadakpan.

Na-recover sa subject ang duha ka sachets sang suspected shabu nga nagabug-at sang lima ka gramo kag may standard drug price nga P34,000.

Ginpahayag ni Lepsia nga isa si alyas Fred sa na-involve sa pila ka mga insidente sang pagpang-hold up sa mga Indian nationals sa banwa sang nagligad nga tuig.

Tungod wala sang nagakaigo nga ebidensya, gin-release siya kag nahulog sa regular filing ang kaso.

Pagkatapos sang buy bust operation, ginserbehan sang warrant of arrest kag search warrant ang subject kag na-recover ang .38 caliber revolver nga pusil nga ginpabutyag sang police gingamit sang subject sa pagpang-hold up.

Presu na ang subject sa Dumangas Police Station kag pasakaan sang kaso nga paglapas sa Dangerous Drugs Act of 2002 kag illegal possession of firearm.