Pulis ginreklamo nga nagpanaya sang pusil sa City Proper
Preso sa Iloilo City Police Station 1 ang pulis sang gindakup sang otoridad tungod ginreklamo nga nagpanaya sang pusil sa Brgy. Gen Hughes, City Proper pasado las-11 sang Sabado sang gab-i, Pebrero 25.
Sa impormasyon nga nakuha sang Aksyon Radyo Iloilo, ang amo nga pulis nakabase sa isa ka police station sa siyudad pero indi pa mabuyagyag.
Base sa source, nag-ugat ang pagpanaya sang pusil sang ginsita sang pulis ang bata nga hinali lang nagtabok sa karsada nga gina-usoy niya.
Natabuan naman nga may naga-inum-inom sa higad sang dalan kag nakita nila nga ginsita sang pulis ang bata.
Ginsita man sang mga naga-inom ang pulis nga rason sang pagpanaya niya sang pusil.
Padayon pa nga gina-imbestigaran sang Iloilo City Police Office ang pulis nga detained na sa Iloilo City Police Station 1.
Wala ginhingadlan sang kapulisan ang ginreklamo nga police.
ASSIGNED SA CAMP DELGADO
Na-assign sa Camp Gen. Martin Delgado sa Fort San Pedro, City Proper ang pulis nga nagpanaya sang pusil.
Ini base sa impormasyon nga nakuha sang mga tagreklamo halin sa kakilala nila man nga pulis sa kampo.
Dugang pa sang mga tagreklamo, halin sa Roxas, Capiz ang amo nga pulis kag gin-reassign lang sa Kampo Delgado tungod masami nga nagapa-isug-isog sa lugar.
Suno kay alyas Ron nga isa sa nagpatunga sang pagpanaya sang pulis sa mga tagreklamo, nagpamahog pa ang pulis nga balikan sila kun makaguwa siya sa presuhan.
Ginlaragway sang mga tagreklamo ang pulis nga maputi, mga 5’5 ang height kag yara sa 20s ang pang-edaron.
