70 grams sang suspected shabu na-recover sa drug buy bust sa Jaro

ILOILO CITY — 70 grams sang suspected shabu nga may standard drug price nga P476,000 ang na-recover sa 18-anyos nga babaye sa drug buy bust operation sa Dungon A, Jaro kahapon, Abril 17.

Ginkilala ang subject kay Averose Prevendido sang Brgy. Bakhaw, Mandurriao kag ginakabig sang pulis nga High Value Individual drug personality.

Suno kay Police Captain Ryan Christ Inot, team leader sang Regional Police Drug Enforcement Unit, ang subject ang ginatudlo nga source sang mga durugista nga nagkaladakpan sadto sa mga operasyon sang police.

Isa ka bulan nga gin-monitor ang illegal activities sang subject tubtob nadakpan sa diin natukiban nga siya ang nagadul-ong sang items sa iya mga parokyano.

Gina-validate pa sang police ang ginakuhaan sang subject sang illegal drugs.

Sa impormasyon sang pulis, si Prevendido ang bata ni alyas Nog-nog nga kilala man kag masami ginatudlo nga source sang illegal drugs sang pila ka mga durugista nga nagkaladakpan .

Nagpamalibad si Prevendido nga maghatag sang iya pahayag sang ginpamangkot sang Aksyon Radyo Iloilo news team. — via Aksyon Farrah Mae Morano