“Immediate termination” ginrekomendar sang TMU sa traffic aide nga ginreklamo nagpangilkil sa Jaro
ILOILO CITY — Ginrekomendar para sa “immediate termination” ang traffic aide nga ginreklamo nagpangilkil sa Jaro.
Suno kay Retired Colonel Uldarico Garbanzos, co chairman sang City Traffic Management Unit, ini pagkatapos sang pag-imbestigar sang TMU kag napamatud-an nga matuod ang reklamo batok sa traffic aide.
Antes pa man nag-viral ang video sa social media, nakalab-ut na sa opisina sang TMU ang impormasyon gani gilayon nag-deploy sang investigator ang TMU agud i-verify, suno kay Garbanzos.
Una na nga ginpahayag sang concerned citizen sa iya Facebook post nga ginapangitaan sang paagi sang traffic aide nga madakop ang mga motorista bisan wala violation kag nagapanukot sang P2,000 agud indi ma-impound ang salakyan.
Ginpatawag sang TMU ang amo nga traffic aide agud mapangayuan sang paathag pero naghipos lang, suno kay Garbanzos.
“Gintapos na naton dayon ang investigation report kag gin-submit ini sa aton Traffic Management Unit nga ang chair na ang aton City Administrator recommending him for immediate termination. Nagahulat na lang kita sang proper order,” suno kay Garbanzos.
Antes ang proper order, gin-relieve sa iya post sa Jaro ang traffic aide kag maga-duty sa bag-o nga opisina sang TMU sa Fort San Pedro.
Ginpabutyag ni Garbanzos nga wala nila ginatolerar ang amo nga buluhaton.
