Gunman sa pagpatay sa trisikad driver sa Pavia nadakpan

ILOILO- Nadakpan na sang isa sa duha ka suspek sa pagtiro sa trisikad driver sa Brgy. Balabag, Pavia sang Oktubre 5 sa Rizal, Lapuz subong nga kaagahon.

Ginkilala ang suspek kay alyas Caloy nga taga-Jereos, La Paz nga amo ang gunman sa krimen.

Suno kay Police Major Dadje Delima, hepe sang Pavia Municipal Police Station, nakabaton sila sang impormasyon halin sa confidential informant nga mapadulong sa Brgy. San Antonio, Molo kag Rizal sa Lapuz ang suspek.

Nagpangayo sang assistance ang Pavia police sa kapulisan sa syudad sang Iloilo agud mag-deploy sang mga operatiba.

Ginpahayag ni Delima nga ginbantayan nila ang suspek halin las-5 sang hapon kahapon tubtob la una kaina sang kaagahon.

Nagtuyo pa magpalagyo ang suspek.

Samtang, at-large gihapon ang kaupod ni Caloy nga si alyas Aljun nga amo ang driver sang motorsiklo sang gintiro ang biktima. — via Aksyon Paula Elambayo