Miyembro sang Prevendido Drug Group kag iya live-in partner nakuhaan sang P2 million nga balor sang suspected shabu sa Pavia
ILOILO — Nakuhaan sang P2 million nga balor sang suspected shabu ang miyembro sang Prevendido Drug Group kag iya live-in partner sa drug buy bust operation sa Barangay Pagsangaan, Pavia kahapon, Disyembre 11.
Ginkilala ang mga subjects kanday alyas Manong, 49-anyos kag Evelyn-45-anyos nga residente sang Bakhaw, Mandurriao.
Suno kay Police Lieutenant Gabriel Manguera, Deputy Chief for Operations sang Pavia Municipal Police Station, naga-operate gihapon ang grupo tungod may mga miyembro pa nga aktibo.
Isa ka bulan pa lang nga nagatiner sa Pavia ang mag-live partner tungod nabatyagan nila nga mainit na ang dakpanay sa siyudad.
Sa isa ka semana nga monitoring sang police, na-validate nga miyembro sang Prevendido Drug Grupo si Manong.
Base man sa monitoring sang police, sa probinsiya ukon sa siyudad sang Iloilo nagahalin ang supply.
Ginkumpirmar man ni Manguera nga may nagahimo sang illegal nga druga sa Iloilo pero indi pa mabuyagyag sang kapulisan ang lokasyon.
Dugang niya, may iban pa nga miyembro sang grupo nga gina-monitor ang kapulisan nga sa probinsiya nagatiner.
Na-recover sang mga subject ang pito ka sachets kag lima ka knot-tied ukon dalagku nga pinutos sang suspected shabu nga ginabanta nagabug-at sang 300 grams kag may estimated value nga P2,040,000. — Aksyon Maria Kayla Tingzon
