Senior citizen nga ginreklamo nagpalupok sang pusil sa La Paz gindakop sang pulis

ILOILO CITY — Gindakop sang La Paz police ang 66-anyos nga lalaki sang nagpalupok sang pusil sa Brgy. Gustilo, La Paz kagab-i, December 30.

Ginkilala ang nadakpan kay alyas Rich kag tumandok sang amo nga barangay.

Nakabaton sang tawag halin sa concerned citizen ang La Paz police nga may nagapalupok sa ila barangay rason nga gin-respondehan kag ila nadakpan si Rich nga may ginataklos nga .45 pistol.

Sa dugang nga pagpangusisa sang police, may rehistro ang pusil apang expired ang permit to carry firearms outside residence sang November 16 pa.

Na-recover sa area ang deformed slug, fired cartridge case, duha ka magazine nga loaded sang anum ka mga cartridges kag 13 ka dugang nga live cartridges sa belt bag ni Rich.

Detain sa La Paz Police Station si Rich.

Kaso nga paglapas sa Comprehensive Firearms and Ammunition Regulation Act ang ipasaka kay Rich. — Aksyon Cedrick Anona