Iloilo City Gov’t mapatuman sang mga pagsulundan agud mapabilin nga matinlo kag safe ang Iloilo Sunset Boulevard
May ipatuman nga rules and guidelines ang Iloilo City Government agud mapabilin nga matinlo kag safe ang bag-o lang ginbuksan nga Iloilo Sunset Boulevard, naga-angot sang Brgy. Tabucan, Mandurriao kag Cagbang, Oton.
Ini base sa statement nga ginpaguwa ni Mayor Jerry Treñas pagkatapos sang partial turnover sang proyekto halin sa Department of Public Works and Highways 6.
Suno kay Treñas, nagapangayo siya sang otoridad sa Sangguniang Panlungsod para sa formal turnover sang proyekto samtang magahimo sang inspection sa proyekto ang mga personnel sang City Engineer’s Office.
Mapahamtang ang city government sang comfort rooms, mga basurahan, benches, kag CCTV cameras sa Sunset Boulevard.
May i-deploy nga sweepers agud magpabilin sang katinlo sa lugar samtang magabantay naman ang mga green guards kag kapulisan agud mangin safe ang publiko nga nagabisita sa lugar.
Kinahanglan suno sa alkalde, nga magdihon sang pagsulundan kag polisa sa mga nagapadulong sa Sunset Boulevard lakip na ang anti-littering, alcohol consumption, kag iban pa nga mga aktibidad.
Nagapakig-angut man si Engr. Neil Ravena, head sang General Services Office sa Oton LGU agud magsantu ang mga inisyatibo nga ipatuman sa proyekto.
