19-anyos nga lalaki ginpahayag nagahampang sang panagu-ay natiruhan sang barangay kagawad sa La Paz
ILOILO— Pilason ang 19-anyos nga lalaki sang natiruhan sang Barangay Kagawad sa Tabuc Suba, La Paz las-3:45 sang kaagahon sang Pebrero 9.
Ginkilala ang biktima kay Dennis Osano residente sang Brgy. Gustilo, La Paz. Suspek sa pagpangtiro si Tabuc Suba, La Paz Barangay Kagawad Kayot Jeruta, 64-anyos.
Suno kay Police Major Tranquilino Querubin Jr., hepe sang Iloilo City Police Station 2, ginpahayag sang biktima nga nagahampang sila sang panagu-ay kaupod ang masobra lima ka mga abyan.
Nakita sang kagawad ang biktima nga nagapanago sa private property, suno sa police gani ginsita niya. Nagdalagan pa ang biktima kag dyutayan lang mabungguan ang kagawad, suno kay Querubin.
Nadiskubrihan na lang sang mga upod sang biktima nga natiruhan na siya sa tuo nga porsyon sang likod.
“Suno sa barangay kagawad natingala siya kuno bala nga sa amo na nga oras may persona nga nagapanago. Siguro ginpanilagan niya man. Syempre kay barangay official man siya, duda siya guro nga may malain nga intensyon ang persona nga nagapanago dira nga lugar,” dugang nga pahayag ni Querubin.
Nagpadulong sa police station ang biktima kag gin-report ang insidente bisan may pilas na siya sang pagkatiro antes gindala sa ospital.
Gindakop sang mga police ang kagawad nga suspek, dala ang snub nose revolver nga gingamit sa pagpangtiro.
Nagapaayo subong sa ospital ang biktima, suno sa police. Gindala man sang police sa ospital ang suspek tungod nagataas ang iya nga blood pressure.
Gintinguhaan sang Aksyon Radyo Iloilo News team nga kuhaan sang pahayag ang suspek, pero gindala na sa ospital.
Padayon ang imbestigasyon sang police sa insidente kag ginapreparar ang kaso nga frustrated homicide kag violation sa Comelec gunban. — Aksyon Farrah Mae Morano
