Driver sang motorsiklo patay sang na-aksidente sa Barotac Nuevo
ILOILO — Patay ang 21-anyos nga lalaki nga naga-drive sang motorsiklo sang naaksidente sa Barangay Lico-an, Barotac Nuevo kahapon, Marso 20.
Suno kay Police Captain Cedric Cruz, hepe sang Barotac Nuevo Municipal Police Station, nadulaan sang kontrol kag natumba ang 21-anyos nga driver sang motorsiklo antes pa man siya mag-overtake sa ginasundan nga truck.
Dugang ni Cruz, tungod nadulaan kontrol ang driver nahulog siya sa motorsiklo kag nag-igo ang iya ulo sa semento. Nagbunggo naman ang iya motorsiklo sa truck.
Wala sang suksok nga helmet ang driver sang motorsiklo. Gindala pa siya sa ospital pero gindeklarar nga dead on arrival.
Pareho nga yara sa outer lane ang mga salakyan kag pakadto sa direksyon sang Anilao suno sa police.
Yara sa kustodiya sang Barotac Nuevo police ang 42-anyos nga driver sang truck nga taga-Ajuy. — Aksyon Maria Kayla Tingzon
