[Trigger warning: Violence] Amay gingapos, ginsakit ang duha ka menor-de-edad nga bata sang nakita ang sex video sang iya asawa nga yara sa luwas sa pungsod

ILOILO—Gingapos kag ginsakit sang amay ang duha niya ka kabataan nga lalaki kag ginkuhaan pa sang video kag ginpadala sa iya nga asawa nga yara subong sa abroad.

Ginkilala ang amay kay alyas Jun, 31-anyos sang Compo, San Enrique nga ginreklamo sang iya asawa nga yara sa Saudi Arabia sang gingapos kag ginsakit ang ila walo kag 10 ka tuig nga bata nga lunsay lalaki.

Suno kay PLT Christy Val Dalde, hepe sang San Enrique Municipal Police Station, nag-ugat ang pagpangsakit sang amay sa ila duha ka mga bata sang nadakpan niya nga nagaluib sa luwas sang pungsod ang iya nga asawa.

Nadakpan ni Jun ang iya nga asawa paagi sa pag-hack sang iya messenger account kon diin nakita niya ang mga sex videos sang iya asawa upod ang katrabaho niya nga Pinoy man.

Tungod sa tuman nga kaakig, gingapos sang amay kag ginsakit ang iya duha ka bata, ginkuhaan sang video kag ginpadala sa iya nga asawa.

Sa video, makit-an nga samtang ginasakit sang amay ang iya duha ka bata nagapakitluoy siya sa asawa nga magpauli na.

Tungod sa natabu, luyag sang asawa nga bawion ang iya duha ka mga bata, pero indi magpasugot si Jun.

Nakalab-ut na kay San Enrique Mayor Trixie Fernandez kag mga opisyal sang barangay ang natabu kag ginpadulungan ang balay sang mag-amay.

Gin-istorya sang alkalde ang amay kag nagpasalig nga himuan sang nagakaigo nga intervention ang sitwasyon.

Subong nga adlaw natalana istoryahan sa Municipal Social Welfare and Development Office (MSWDO) ang kaso sang amay kag iya asawa, lakip na ang mangin kustodiya sang duha ka bata. — Aksyon Marvin Malificiar