Anay barangay kagawad dakup sa drug buy bust sa Cabatuan
ILOILO — DakUp ang anay barangay kagawad sa drug buy bust operation sang Cabatuan Police – Station Drug Enforcement Team (SDET) sa Brgy. Jelicuon Montinola, Cabatuan kahapon sang aga.
Ginkilala ang nadakpan kay alyas Fred, 53-anyos, sang amo nga barangay.
Suno kay Police Captain Aileen Lacrite, officer-in-charge sang Cabatuan Municipal Police Station, December 2024 sang gin-monitor ang aktibidad sang subject tubtob nga nadakpan.
Sa pagpangusisa sang police, 2016 sang nadakpan sa buy bust operation ang subject kag nakaguwa sang 2019.
Ginpabutyag ni Lacrite nga isa sa mga ginakuhaan sang illegal drugs sa Cabatuan ang subject.
Naga-operate man sa New Lucena, Janiuay kag Mina ang subject suno sa police.
Sa operasyon sang police, na-recover ang 14 ka sachets sang suspected shabu nga ginabanta nagabug-at sang 60 grams kag nagabalor sang P406,000.
Preso sa Cabatuan Police Station ang subject kag natalana pasakaan sang kaso nga paglapas sa Republic Act 9165 ukon ang Comprehensive Dangerous Drugs Act of 2002. — Aksyon Paula Elambayo
